Poetic Tributes
By: Saif Chughtai
Hum jisey apni saqafat ka nishaaN kehtey haiN
Fun kii dunya mein usse Noor Jehan kehtey haiN
Guftugu karti hai wo sur ki zubaaN mein goya
Uss ke maddaah usse sur ki zubaaN kehtey haiN
Dil ko ik-gona sukooN milta hai sun kar uss ko
YuN usse raahat-e-dil, raahat-e-Jaan kehtey haiN
Lafz iss tarha saNwertey haiN zubaaN par uski
Usko suntey hain to sab ahl-e-zubaaN kehtey haiN
Sher ka hussn ziyaada hii nikhar jaata hai
Hussn kehtey haiN usse, hussn-e-bayaaN kehtey haiN
Jin ko raghbat ho zara bhi fun-e-mosiiqi se
Uss ki aawaz ko ik jins-e-garaN kehtey haiN
Koi hoga, na huwa hai, na tha saani uska
Hum hi nkab kehtey haiN, sab ahl-e-JahaN kehtey haiN
Roshni sur ki fizaaon mein bikhar jaati hai
Baandh deti hai wo ik aisa samaN, kehtey haiN
Sher, sh’er ke qalam se jo ho takhleeq koi
Uski aawaz mein hota hai jawaaN kehtey haiN
Khud-ba-khud dil mein utar jaata hain mafhoom uska
Sher ban jaata hai tasveer-e-jehaN, kehtey haiN
Kaamyabi ki zamanat haiN taraney uske
Usko gulbaang-e-watan, piir-o-jawaaN kehtey haiN
Baari, behri ho, hawaai ho, koi fauj bhi ho
Sab usse walwala-e-zinda dilaaN kehtey haiN
Hai duaa saif ki allah salaamat rakhey
Jisko naghmaat kii hum rooh-o-rawaaN kehtey hain.
By: Afzal Ulfat.
Sangeet ka to qulzum-e-hairat nishaaN hai who
Naghmaat-e-dil nawaaz ki ik kehkashaN hai who
Aawaz aur hussn-e-tarnnum bhi dil nawaaz
Sur, taal aur ley ka ik sail-e-rawaaN hai who
Phaila huwa hai su-ba-su uske galey ka noor
Noor-e-jehaN hai aur suroor-e-jehaN hai who
Dunya-e-saaz-o-naghma-o-aawaz ke liyey
Qudrat ka be misaal hassiiN armughaaN hai who
HaaN Malka-e-tarnnum-o-hussn-e-nawa ke saath
Ik paikar-e-jamaal ba-sadd izzo shaaN hai who
Be taaj-o-takht hi sahi lekin khuda gawaah
Iqleem-e-fun ki taajdar-o-hukmraaN hai who
Naghmaat-o-raqs-o-rang ki jo hai saji hoi
Iss bazm-e-pur wiqaar ki rooh-e-rawaaN hai who
Miinaar-e-pur wiqaar-o-gohar baar ki tarha
Sangeet-o-fun ki azmatoN ke darmeyaaN hai who
Jiss mein hujoom-e-gham bhi ho, kaif-o-suroor bhi
Rangeen-o-dil gudaaz sii ik daastaN hai who
NaazaN hariim-e-fun ki haiN jin azmatoN pe hum
Unn ki ameen hi nahin, ik paasbaN hain who
Ho jaaey gum to milta hai sadyoN ke baad hii
Sangeet-o-fun ka aisa hii durr-e-garaN hai who
Saaz-o-nawa-o-hussn-e-tarnnum ki jo bhi haiN
Afzal tareeN unn azmatoN ki paasbaN hai who
By: Yunus Hamdam.
Galey meiN noor kii surat surooN ki kehkashaN thii who
Tarannum jis pe naazaN tha wohi Noor-e-JehaN thii who
Wo kya aawaz thii jo shoal bhi thii aur shabnam bhii
Seher aisa tha uska bas dilon ko loot leti thii
Sur uske paas aakar ik naey saanchey meiN dhaltey thay
Ye who aawaz thi jis meiN hazaroN geet paltey thay
Suriila-pann khud uss aawaz ka marhoon-e-minnat tha
Na uss aawaz ka dunia meiN ab nemul-badal hoga
Raseeley uskey geetoN ko bhulaya ja nahiN sakta
DiloN se uskii chahat ko bhulaaya ja nahiN sakta
Tarannum ki ye malka sab ko rota chhor jaey gii
Ye sadyoN tak zamane ko bohat hii yaad aaey gii
Khuda ne zindagi meiN usko wo izzat wo shohrat dii
Ke baad-az marg bhi usko badi azmat ata kar dii
By: Habib Jalib
Rang, nak-hat, bahaar Noor Jehan
Kaif, mastii, khumaar Noor Jehan
Geet, sangeet, pyaar Noor Jehan
Sher, naghma hazaar Noor Jehan
Hussn, khoobi, nigaar Noor Jehan
Amn, raahat, qaraar Noor Jehan
Hum se ranj-o-alam ke maaroN ki
Dost, hamdard, yaar Noor Jehan
Andaleeb-e-chaman, sada’ey watan
Pur kashish, pur wiqaar Noor Jehan
Jeetey ji ho gaii hai laafani
Naghma-gar, nghma-bar Noor Jehan
Gaaey ja, shaikh-o-barhaman ki na sun
Tujh pe aalam nisaar Noor Jehan
By: Taaj Saeed
Noor hii noor thi aawaz uski
Taal aur mail ne jis ki
Aik dunya ko
Apna grweeda bana rakha tha
Aur jis ke rukh-e-roshan ka jamaal
Uskii aawaz ko kuchh aur bhi pur noor bana deta tha
Jis ke hussn-e-takallum ka hassiiN aur annokha jaadu
Sur ke saagar meiN ik halchal sii macha deta tha
Noor Jehan Noor-e-Jehan thi
Uski taaziim wohi kartey thay
Jo tarnnum pe sada se thay fida
Sher kii devi pe bhi jaan apni kartey thay nisaar
Ye kamaaa uske fun ka hii nahin
Ye karishma tha mohabbat aur aqeedat ka saeed
Jiske jaadu ne
Saari dunia hii ko diwaana bana rakha tha
Yehi aawaz thi jo
Raag aur rang ke jalwoN kii tamannaii thi
Yehi aawaz thii jiski le-kaari ne
SainkroN geetoN aur naghmoN meiN rooh phoonki thii
Jin ko sunney ke liyey
Gosh-bar aawaz thii saary dunia.
By: Aezaaz ahmed aazar.
Teen kii chat pe boond saawan kii
Jis tarha jaltarang bajaati hai
Chandni juN lipat ke lehroN se
Soley holey se gungunaati hai
Jis tarha pichhli shab koi koel
Door jaane kahin, kissi dhun meiN
Ik madhur raagni sunaati hai
Jaise shabnam ka ik hassiN qatra
Kaan meiN pankhadi ke dhiire se
Naghma-e-sarmadi sunaata hai
Ya kahin door, parbatoN se pare
Koi charwaha, le pe bansi ki
Dholey, tappey ki dhun bajata hi
Jaise pooja ke waqt mandir meiN
Un-ginat ghantiyaN sii bajti haiN
Jis tarha choriaN chhanakti haiN
Jis tarha payaliN khanakti haiN
Uski aawaz hari ghari aazar
Mere kaanoN meiN aati rehti hai.
Share Link: 
| < Prev | Next > |
|---|
